د متحده عرب اماراتو یوه جګپوړي چارواکي د امریکا او ایران د اټومي خبرو په اړه د خوشبینۍ له څرګندولو سربېره، خبرداری ورکړی چې د دواړو هېوادونو ترمنځ د پوځي نښتې شونتیا لا شته او امارات احتمالي پېښو ته چمتووالی نیسي.
فاکس نیوز شنبه د نومبر پر ۷مه راپور ورکړی چې د اماراتو جګپوړي چارواکي ډاکټر علي راشد النعیمي د قطر په منځګړیتوب د واشنګټن او تهران ترمنځ خبرو د پرمختګ نښو ته په اشارې هیله څرګنده کړې چې دا به د دواړو غاړو ترمنځ د باور رامنځته کېدو لامل شي.
النعیمي هیله ښودلې چې امریکا او ایران دې خپل اختلافات د ډیپلوماسۍ له لارې حل کړي او د یوې بلې جګړې مخه ونیسي.
نوموړي ټینګار کړی چې د پوځي نښتې ګواښ لا پر ځای دی او د جګړې شونتیا له پامه نه شي غورځېدای.
النعیمي ویلي: «موږ تر ټولو بد حالت ته پلان جوړوو، خو د غوره پایلې هیله لرو.»
دا په داسې حال کې ده چې د روان کال په لومړیو کې متحده عرب امارات د ایران د څه باندې درېیو زره توغندیو او بېپیلوټه الوتکو د بریدونو هدف ګرځېدلی و.
