۸صبح، کابل: اروپايي ټولنه وايي چې افغانستان په نړۍ کې د میندو د مړینې لوړه کچه لري او میندو او نویو زېږېدلو ماشومانو ته د مناسبو روغتیايي خدماتو وړاندې کول ځانګړی ارزښت لري.
نوموړي بنسټ یکشنبه د چنګاښ پر ۲۸مه په اېکس کې لیکلي چې د ملګرو ملتونو د وګړو له صندوق (UNFPA) سره په ګډه یې په لوګر کې د قابلو تر مدیریت لاندې د زېږون د پاملرنې له یوه مرکزه لیدنه کړې ده.
اروپايي ټولنې زیاته کړې چې دا مرکز د دغه بنسټ په مالي بنسټ فعالیت کوي او روزل شوې قابلې میندو او نویو زېږېدلو ماشومانو ته خوندي خدمات وړاندې کوي.
له زېږون مخکې او د زېږون پر مهال د روغتیايي خدماتو وړاندې کول د میندو او نویو زېږېدلو ماشومانو د مړینې په کمولو کې مرسته کوي.
نړیوالو روغتیايي بنسټونو په وار وار په افغانستان کې د میندو او ماشومانو له روغتیايي وضعیته اندېښنه ښودلې او د روغتیايي خدماتو پر پراخولو یې ټینګار کړی دی.
