۸صبح، کابل: اروپايي ټولنې په افغانستان کې له بشري حقونو سرغړونه او د ښځو او نجونو پر وړاندې بنسټیز شوی تبعیض په کلکه غندلی دی.
دغې ټولنې چهارشنبه د لړم پر ۶مه ویلي چې په افغانستان کې د ښځو او نجونو له حقونو سیسټماټیکه سرغړونه ښايي د جنسیت پر بنسټ د ځورونې مصداق او د بشریت پر وړاندې جنایت وبلل شي.
اروپايي ټولنې له زدهکړو او په ټولنیز ژوند کې له ګډون څخه د ښځو او نجونو بې برخې کول د هغوی د بنسټیزو حقونو او ازادیو ښکاره سرغړونه بللی او د دغو بندېزونو د سملاسی لرې کولو غوښتنه یې کړې ده.
دې ټولنې د بېوزلۍ او خوارځواکۍ د پراخېدو، د ماشومانو د کار د زیاتېدو او د جبري او کمعمره ودونو په اړه هم اندېښنه څرګنده کړې ده.
اروپايي ټولنې له طالبانو غوښتي چې د اعدام او بدني مجازاتو لړۍ ودروي او د قومي او مذهبي لږکیو، زیانمنونکو کسانو او د «الجيبيټي» ټولنې د غړو حقونو ته درناوی وکړي.
اروپايي ټولنې له افغانانو، په افغانستان کې د ملګرو ملتونو د مرستندویه پلاوي (یوناما) او د بشري حقونو د ځانګړي راپور ورکوونکي له ماموریت څخه د خپل ملاتړ پر دوام ټینګار کړی او د افغانستان لپاره یې د خپلواک څېړنیز میکانیزم د ملاتړ غوښتنه کړې ده.
یادې ټولنې له بشري حقونو د سرغړونې د عاملانو د حساب ورکولو او د افغانانو په مشرۍ د یوه ټولګډوني سیاسي بهیر د رامنځته کېدو ملاتړ هم کړی چې ښځې په کې په بشپړ او برابر ډول ګډون ولري.
