۸صبح، کابل: اروپايي ټولنې پر افغانستان د پاکستان هوايي بریدونو ته په غبرګون کې ویلي چې ملکیان او ملکي زېربناوې دې هېڅکله هم نه په نښه کېږي.
نوموړې ټولنې دوشنبه د چنګاښ پر ۸مه په خپله اېکس پاڼه کې لیکلي چې په هر ډول شرایطو کې دې بشردوستانه قوانینو ته پام وشي او له ملکیانو پر خوندیتوب یې ټينګار کړی دی.
اروپايي ټولنې ښکېل لوري زغم ته رابللي او ویلې دي چې د ترینګلتیاوو له پراخېدو دې مخنیوی وشي څو د نښتو د کمېدو لپاره لاره چاره برابره شي.
دا په داسې حال کې ده چې طالبانو بیګاه شپه ویلي چې پر کونړ، پکتیا او پکتیکا د پاکستان په هوايي بریدونو کې د ښځو او ماشومانو په ګډون ۳۶ ملکیان وژل شوي او ۱۶۳ نور ټپیان دي.
ورته مهال په افغانستان کې د ملګرو ملتونو مرستندویه پلاوي (یوناما) تایید کړې چې پر پکتیا، پکتیکا او کونړ د پاکستان په هوايي بریدونو کې ۲۸ ملکیان وژل شوي او ۴۹ نور ټپيان دي.
