د ننګرهار ولايت مرکز د جلالاباد ښار اړوند څلورمې ناحیې بارګینو سیمه کې درېيمې پلې لوا ته څېرمه شاوخوا يو ساعت وړاندې د «۰۲» قطعې پر موټریز کاروان چاودنه شوې ده.
د ننګرهار د والي ویاند عطاالله خوږیاڼی وايي چې، چاودنه د «۰۲» قطعې پر ځواکونو شوې چې له امله یې یو ملکي وګړی «زرنج چلوونکی» وژل شوی او ۶ نور ملکي وګړي ټپیان شوي دي.
نوموړی زیاتوي چې د «۰۲» قطعې ځواکونو د تلفاتو په اړه معلومات نه لري، خو په ورته وخت کې عیني شاهدان وایي چې، چادونه کې مرګ ژوبله اوښتې چې ډېری يې ملکي وګړي دي.
د عامي روغتیا ریاست یوې سرچینې ۸صبح ته د نوم نه ښودلو په شرط وويل چې، د پېښې له ځایه ورته ۶ ټپيان وروړل شوي چې ټول ملکي وګړي دي.
د یادونې وړ ده چې څو میاشتې وړاندې هم د یادې قطعې پر ځواکونو ورته برید شوی ؤ چې هغه مهال یې پړه داعش ډلې منلې وه.
