۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق وايي چې ملکي افغانان دې د پاکستاني طالبانو تحریک (ټيټيپي) پر سر د طالبانو او پاکستان د نښتو بیه نه پرې کوي.
فایق پنجشنبه د تلې پر ۹مه په اېکس پاڼه کې په کونړ او هلمند کې د پاکستان هوايي بریدونه چې په افغانستان کې د ملګرو ملتونو مرستندویه پلاوي (یوناما) ویلي د ماشومانو په ګډون ۱۰ ملکیان پکې وژل شوي، غندلي دي.
فایق له ترهګرو ډلو لکه ټيټيپي څخه د طالبانو د ملاتړ تګلاره غندلې او ویلې یې دي چې دا تګلارې افغانستان او سیمه له خطر سره مخ کوي.
نوموړي ټينګار کړی چې له ترهګرۍ سره مبارزه ملکیانو یا د افغانستان له ځمکنۍ بشپړتیا سرغړونه نه شي توجیه کولی.
فایق د دغو نښتو د ژر تر ژر پای ته رسېدو غوښتنې ترڅنګ، له ملکیانو د خوندیتوب او نړیوالو حقوقو ته د پاملرنې غوښتنه هم کړې ده.
