۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق د افغانستان په ختیځ کې د مرګونو زلزلو د قربانیانو له کورنیو سره غمشریکې کړې ده.
فایق دوشنبه د وږي پر ۱۰مه په خپله اېکسپاڼه کې لیکلي: «په ډېرې خواشینې مې د افغانستان په ختیځ کې د ویجاوړونکې زلزلې خبر واورېد چې ګڼ تلفات لري. زما دوعا له ټولو قربانیانو، کورنیو او له هغوی سره ده چې له کړاو او مصیبت سره مخ دي.»
نوموړي زیاته کړې چې په بېړنیو او بحراني شرایطو کې افغانان له بل هر وخت ډېر بشري ملاتړ، بشردوستانه مرستو، نړیوال یووالي او نړیوالې پاملرنې ته اړتیا لري.
دا په داسې حال کې ده چې د افغانستان په ختیځ کې د وړمې شپې زلزلې سلګونو کسانو ته مرګژوبله اړولې ده.
د راپورونو له مخې، تر اوسه په دې طبیعي پېښه کې ۱۴۰۰ کسان مړه شوي او ۳۱۲۴ نور ټپيان دي.
