یوې باخبره ایراني سرچینې د سعودي د العربيه رسنۍ هغه راپور رد کړی چې وايي تهران واشنګټن ته د ایران د بندرونو د سمندري کلابندۍ د لېرې کولو په بدل کې د هرمز تنګي د بیا پرانیستلو وړاندیز کړی. سرچينې دا راپور “دروغ او خیالي” بللی دی.
د تسنیم خبري اژانس يکشنبه د اکټوبر پر ۲۵مه، راپور ورکړی چې دې باخبره سرچینې ټینګار کړی، ایران د سمندري کلابندۍ د لغوه کېدو په بدل کې د هرمز تنګي د بېرته پرانیستلو هېڅ ډول معامله نه مني.
د سرچینې په وینا، ایران د خپلو لارو چارو له مخې محاصره ماتوي او په پای کې به یې په بشپړ ډول له منځه یوسي.
دې باخبره چارواکي زیاته کړې چې د ایران رسمي دریځ پر اوو شرطونو ولاړ دی؛ هغه شرطونه چې د منځګړو له لارې امریکايي لوري ته رسول شوي دي. د نوموړي په وینا، په دې اړه د رسنیو نور اټکلونه باوري نه دي.
سرچينې همداراز ویلي چې د ایران اووه ورځنی پلان چې د هرمز تنګي د بېرته پرانیستلو په اړه د دغه هېواد غوښتنې پکې شاملې دي، تر دې مخکې امریکايي لوري ته سپارل شوی دی.
د دغې سرچینې په وینا، تر هغو چې د دغه هېواد په بندرونو او سمندري تګ راتګ کې د خنډونو د لېرې کولو په ګډون د ایران ټولې غوښتنې پوره نه شي، د هرمز تنګي ناامني به پای ته ونه رسېږي
