۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق ویلي چې په افغانستان کې دې خپلسرې نیونې، شکنجه، ورکېدل او جبري بې ځایه کېدل پای ته ورسېږي.
فایق پنجشنبه د تلې پر ۱۶مه د ملګرو ملتونو د عمومي غونډې په درېیمه کمېټه کې د ځواب ویلو پر پیاوړتیا ټينګار کړی او د جرمونو نړیوالې محکمې له خوا یې د طالب چارواکو د نیولو حکمونو له علني کېدو هرکلی کړی دی.
نوموړي ویلي چې افغان پناهغوښتونکي دې هغو سیمو ته بېرته نه لېږل کېږي چې له ګواښ سره مخ دي او بشري مرستې دې له تبعیض او محدودیت پرته د افغان ښځو په ګډون ټولو ته ورسېږي.
فایق زیاته کړې چې د ترهګرۍ پر ضد مبارزه د ملکي وګړو پر وړاندې د ناقانونه بریدونو یا د افغانستان د ځمکنۍ بشپړتیا د نقض لپاره نه شي توجیه کېدی.
په ملګرو ملتونو کې د افغانستان د دایمي استازولۍ سرپرست ویلي چې له طالبانو سره تعامل دې د اړیکو د عادي کېدو لامل نه شي، بلکې دا تعامل دې د بشري حقونو له ښه والي سره مشروط شي.
