۸صبح، کابل: په ملګرو ملتونو کې د افغانستان دایمي استازولۍ سرپرست نصیراحمد فایق ویلي چې له افغان کډوالو سره د ایراني پولیسو چارچلن د منل شویو نړیوالو او کډوالۍ قوانینو او اصولو خلاف دی.
فایق چهارشنبه د زمري پر ۱۷مه په خواله شبکې اېکس کې لیکلي چې له افغان کډوالو سره د ایراني پولیسو وروستی چلن د غندنې او څارنې وړ دی.
نوموړي زیاته کړې: «په ټوله کې له افغان کډوالو سره په ځانګړې توګه له هغو سره چې د اوسېدو قانوني اسناد لري، د ایراني پولیسو چار چلن د منل شویو نړیوالو اصولو او معیارونو او کډوالۍ قانون خلاف دی.»
هغه ویلي: «د ایراني پولیس دا ناانساني او نااسلامي چلن په کلکه توګه د غندنې او تعقیب وړ دی.»
نوموړي له ایراني دولت او ملت څخه غوښتي چې د وروستیو پېښو د مخنیوي او پام لپاره اړین ګامونه پورته کړي.
په دې وروستیو کې په ټولنیزو شبکو کې یوه ویډیو خپره شوې چې ښيي یو ایرانی پولیس د یو افغان ماشوم کډوال پر غاړه پښه ايښې او شکنجه ورکوي.
له افغان کډوال سره د ایراني پولیس دا ډول چلن له پراخو غبرګونونو سره مخ شوی دی.
تازه د طالبانو لوړپوړي غړي انس حقاني له افغان کډوالو غوښتي چې هېواد ته ستانه شي.
