۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق په بامیان کې د طالبانو د مخکېني والي عبدالله سرحدي څرګندونو ته په غبرګون کې ویلي چې د افغانستان د تاریخي اثارو او کلتوري میراثونو له منځه وړل ویاړ نه دی.
فایق سهشنبه د وږي پر ۳مه په اېکس پاڼه کې لیکلي چې په بامیان کې د بودا مجسمې یوازې څو ډبرینې مجسمې نه وې، بلکې دا د افغانستان د څو زره کلن تاریخ یوه برخه وه او په بشري تمدن کې د دې خاورې د ځای ځایګي څرګندې نښې وې.
نوموړي د دغو میراثونو قصدي ویجاړول «د تاریخ، هویت او د یوه ملت د ګډې حافظې پر وړاندې جنایت» او راتلونکو نسلونو ته خیانت بللی دی.
فایق زیاته کړې چې اسلام د علم، کلتور او تاریخ دوښمن نه دی او «ناپوهي، خرافات او د دین افراطي او تحریف شوي تعبیرونه» د مسلمان افغان ولس د باورونو استازیتوب نه کوي.
د افغانستان د دایمي استازولۍ سرپرست په بامیان کې د بودا مجسمو ویجاړول «د افغانستان د تاریخ او هویت پر وجود یو ټپ» بللی او ویلي یې دي چې د افغانانو تاریخي حافظه به هېڅکله هم دا پېښه هېره نه کړي.
دا په داسې حال کې ده چې په بامیان او جوزجان کې د طالبانو پخواني والي عبدالله سرحدي له بيبيسي سره په خبرو کې ویلي چې په بامیان کې یې د بودا مجسمې پر خپلو لاسونو ویجاړې کړې دي.
