ننګرهار کې د وژل شويو کارکوونکو کورنۍ د عدالت غوښتنه کوي
ژباړه: م. ع. پ
۸صبح، کابل: د ګچو په يوې کارخونې کې د هغو ۷ تنه کارکوونکو کورنۍ چې د ننګرهار ولايت د سرخرود ولسوالۍ کې په بې رحمۍ سره ووژل شول له ولسمشر غني او د ننګرهار له سيمهييزو چارواکو د عدالت غوښتنه کوي او وايي چې د دې پېښې لاملين دې پيدا او د قانون منګولو ته وسپاري.
څو ورځې وړاندې د ننګرهار په سرخرود ولسوالۍ کې د ګچو په يوې کارخونه کې اوه تنه کارکوونکي په بې رحمۍ سره ووژل شوه.
محمدهاشم، عارف، خداداد، حبيب، رضا، عليخان او محمدحسين هغه اوه تنه کارکوونکي دي چې په ننګرهار کې وژل شوي دي.
د قربانيانو کورنۍ وايي چې دغه اوه تنه کارکوونکي لومړی وهل شوي او بيا په لاستړلي ډول په ګوليو ويشتل شوي دي. په هغه اعلاميه کې چې د قربانيانو کورنۍ لخوا خپره شوې ده راغلي دي چې دا يو «بشري جنايت» دی، ځکه چې دوی عادي کارکوونکي ؤ او د يوې مړۍ ډوډۍ د ترلاسه کولو لپاره له کابله ننګرهار ته تللي ؤ.
په دغه اعلاميه کې همداراز يادونه شوې ده چې، له دې پېښې وروسته تر دې دمه هېڅ ډول ګام د لاملينو د پېژندنې او د قانون منګولو ته د سپارلو په موخه اخيستل شوی نه دی.
د ننګرهار پوليسو ويلي دي چې، دې پېښه کې د لاس لرلو په تو يې څلور تنه نيولي دي.
دغه قرباني شوي کارکوونکي د غزني او باميان ولايت اوسېدونکي ؤ. هغوی تازه په تازه د ننګرهار ولايت سرخرود ولسوالۍ اړوند د ګچو په يوې کارخونه کې د کار لپاره اشتخدام شوي ؤ.
ولسمشرغني د ننګرهار ولايت د ګچو کارخونې د کارکوونکو وژل غندلي دي. نوموړي همداراز په يو ډول دغه پېښه د طالبانو لخوا ګڼلې ده، خو تر دې دمه ددغې پېښې مسؤليت چا يا کومې ډلې په غاړه نه دی اخيستی.
