مشهوره هندۍ سندرغاړې اشا بوسلې د ۹۲ کالو په عمر په بمبي کې مړه شوې ده.
رویټرز یکشنبه د اپریل پر ۱۲مه راپور ورکړی چې د هندي سینما بالیووډ دا پېژندل شوې سندرغاړې وروسته له هغې ساه ورکړه چې د زړه د حملې له امله روغتون ته لېږدول شوې وه.
اشا بوسلې په خپل هنري ژوند کې د بالیووډ په ګڼو فلمونو کې سندرې ویلي او د هندۍ موسیقۍ له تلپاتې او اغېزمنو څېرو څخه شمېرل کېږي.
د هند لومړي وزیر نریندرا مودي په ګډون ګڼو چارواکو او سیاسي څېرو هغه د معاصرې موسیقۍ ستره هنرمنده بللې.
مودي ویلي: «د هغې فوق العاده هنري سفر چې لسیزې یې دوام وکړ، زموږ کلتوري میراث بډایه کړ او د نړۍ په کچه یې ډېرو زړونو ته لار ومونده.»
اشا بوسلې په نړیواله کچه شهرت لري او له نړیوالو هنرمندانو سره یې همکاري کړې او مهمې هنري جایزې یې اخیستې وې.
