د ملګرو ملتونو سرمنشي انتونیو ګوتېرېش خبرداری ورکړی چې د اقلیمي بدلون له امله د اېلنینو پدیده او د ځمکې د تودوخې لوړېدو ترکیب به د نړۍ اقلیمي شرایط ترینګلي کړي.
ګوتېرېش دوشنبه د نومبر پر ۹مه په اېکس پاڼه کې لیکلي چې نړۍ د سختو اقلیمي شرایطو نوي پړاو ته دننه شوې ده.
نوموړي د هوا پېژندنې نړیوال سازمان تازه راپور ته په اشارې ویلي چې د اېلنینو پدیده له داسې سیارې سره مخ شوې چې د اقلیمي بدلونونو له کبله له وړاندې ډېره ګرمه شوې ده.
د ملګرو ملتونو سرمنشي د هېوادونو له مشرانو غوښتي سملاسي د ګلخانهيي ګازونو خپروای راکم او له فوسیلي سونتوکو څخه عادلانه بدیلونو ته د لېږد بهیر ګړندی کړي.
ګوتېرېش د اقلیمي بدلون له پایلو څخه زیانمنونکو هیوادونو ته د مالي سرچینو او ملاتړ چمتو کولو پر اړتیا هم ټینګار کړی دی.
