۸صبح، کندهار: د ملګرو ملتونو د خوړو او کرنې سازمان (فایو) وايي چې د څاڅکو د اوبو لګولو په سیستم د سمبالو شنو خونو کارول کولای شي په کرنه کې د اوبو مصرف تر ۶۰ سلنې پورې کم کړي.
فایو دوشنبه د وږي پر ۳۰مه، پر خپلې اېکس پاڼه لیکلي چې د اروپايي ټولنې په مالي ملاتړ او د ملګرو ملتونو د پراختیايي پروګرام (UNDP) په همکارۍ، په کندهار کې کروندګرو ته د څاڅکو د اوبو لګولو په سیستم سمبالې شنې خونې جوړې شوې دي.
دغې ادارې زیاته کړې چې شنې خونې له اوبو په اغېزناکې ګټې اخیستنې سره، له موسمه بهر حاصلاتو د کرلو او کورنیو او بازار ته د مغذي سبزیجاتو د تامین زمینه برابروي.
په افغانستان کې د فایو تخنیکي سلاکار اشرف الهواومده، وايي: «اوبه په دې سیمه کې د کروندګرو یو له اصلي محدودیتونو دي. له اقلیم سره سمې ځيرکې ټکنالوژۍ، لکه په شنو خونو کې د سبزیجاتو تولید، د څاڅکو د اوبو لګولو سیسټم او مناسبې کرنیزې لارې چارې، کولای شي له کروندګرو سره مرسته وکړي څو د اوبو او ځمکې له محدودو سرچینو غوره ګټه واخلي.»
د فایو په وینا، د دغو شنو خونو د یوې هغې ساحه شاوخوا ۴۰۰ متره مربع ده او د شپږو کروندګرو ترمنځ ګډه ده.
فایو زیاتوي چې کروندګرو ته تخمونه، سره، وسایل او تخنیکي روزنې هم برابرې شوې دي.
د ملګرو ملتونو دغې ادارې ټینګار کړی چې کروندګرو ته د نیالګیو د مدیریت، خړوبولو، سرې ورکولو، د بوټو د څانګو اخیستو او له افتونو او ناروغیو سره د مبارزې په برخو کې روزنه ورکول کېږي.
دا پروګرام د «افغانستان د ټولنې پایښښت» پروژې یوه برخه ده چې د اروپايي ټولنې په مالي ملاتړ او د فایو، د ملګرو ملتونو د پراختیايي پروګرام، د کډوالۍ نړیوال سازمان (IOM) او له نشه يي توکو او جرمونو سره د مبارزې په برخه کې د ملګرو ملتونو د دفتر (UNODC) په همکارۍ په کندهار، هلمند او بادغیس ولایتونو کې پلي کېږي.
