د ننګرهار ښځو چارو رئیسه فتانه عزیز ځاځۍ وایي، د سولې خبرې ټکنۍ دي، خو ناهيلي نه يؤ.
نوموړې زياتوي، که د سولې خبرو په پایله کې هر ډول نظام راتلونکی وي، مهمه ده چې د ښځو حضور په کې لا پراخ او حقوقو ته يې پاملرنه وشي.
د ننګرهار ولايت د ښځو چارو رئیسې دا څرګندونې په ننګرهار کې د «سولې لار نقشې» تر عنوان لاندې له اونیز ورکشاپ وروسته له ۸صبح ورځپاڼې سره په ځانګړې مرکه کې وکړې.
ځاځۍ دغه راز وويل، دغه ورکشاپ چې يوه اونۍ يې دوام وکړ، د مرکز جلال اباد ښار شاوخوا ۱۵۰ ښځو په کې ګډون کړی ؤ او موخه يې دا وه چې ښځې د سولې په پروسه کې خپله ونډه او همیت باندې پوه شي.
د فتانه عزیز ځاځۍ په باور، وروستیو جګړو په ټوله کې افغان ښځې اندېښمنې کړې دي. ښځې د ټولنې یو مهم او د جګړې له امله تر نورو ډېر دردېدلی قشر دی او باید د سولې خبرو کې یې ونډه معلومه وي.
د ننګرهار د ښځو چارو رئيسه زياتوي، که د سولې خبرې یو څه ټکنۍ هم دي، خو په خبره یې، لا هم د سولې لپاره هیلې مړې نه دي او باید دواړه خواوې د خبرو لړۍ چټکه کړي.
اغلې ځاځۍ وایي، بل هر راتلونکی نظام باید په حکومتي اډانه کې د ښځو لا ډېر حضور ته زمینه برابره کړي.
نوموړې څرګنده کړه: «له وخته مخکې وړاندوينه سخته ده، خو بیا هم مونږ هیله من یو، چې راتلونکي نظام کې د ښځو حضور تر اوس ډېر زیات او حقوقو ته یې هم پاملرنه وشي».
د «سولې لار نقشې» تر عنوان لاندې ورکشاپ کې ګډونوالو ښځو هم هیله څرګنده کړه چې طالبان او افغان حکومت باید پر دایمي اوربند سلا او د سولې خبرې ګړندۍ کړي.
ننګرهار کې ښځې او د ښځو د حقونو غوښتونکي بنسټونه داسې مهال په راتلونکي نظام کې خپل د حضور غوښتنه کوي، چې تازه تازه د افغانستان د جګړې په اړه د افغانستان او پاکستان علماوو په سعودي عربستان کې ګډه ناسته وکړه.
دې ناسته کې د سولې خبرو پر ګړندي کېدو غږ وشو او پاکستان هم چې د افغان سولې یو مهم اړخ بلل کېږي ټینګار وکړ چې افغانستان کې سوله او ناامني دواړه د سیمې پر هېوادونو مستقیم اغېز لري.