۸صبح، فراه: سیمهییزې سرچینې وايي چې ناڅرګندو وسلهوالو د پخواني افغان حکومت یو نظامي د کور په مخکې ویشتلی دی.
سرچینو سهشنبه د تلې پر ۲۸مه ۸صبح ورځپاڼې ته وویل چې دا پېښه تېره چهارشنبه د فراه د مرکز اړوند په «قلعه محمد» سیمه کې شوې ده.
د سرچینو په خبره، وژل شوی کس محمدعارف نومېده او د مخکېني حکومت پر مهال یې د فراه په امنیې قوماندانۍ کې دنده لرله.
سرچینې زیاتوي چې محمدعارف له هېڅ ډلې سره تړاو نه لاره او د کور مخکې یې یو کوچنی دوکان درلود.
د سرچینو په خبره، وسلهوال د ماښام له لمانځه وروسته دغه کس ته نږدې شوې او مخامخ یې په مرمۍ ویشتلی دی.
دا په داسې حال کې ده چې د راپورونو له مخې، د طالبانو له واکمنېدو وروسته ګڼ پخواني افغان نظامیان په ورته بریدونه کې وژل شوي دي.
