۸صبح، کابل: په ملګرو ملتونو کې د افغانستان د دایمي استازولۍ سرپرست، نصیر احمد فایق د ملګرو ملتونو امنیت شورا په غونډه کې ویلي چې افغانستان د «سیاسي مشروعیت او حکومتولۍ له ژور ناورین» سره مخ دی.
فایق پنجشنبه د وږي پر ۲۶مه، د یوې اعلامیې په خپرولو سره ویلي چې د طالبانو له واکمنېدو پنځه کاله وروسته، لا هم په هېواد کې کوم ټولګډونی سیاسي نظام او د خلکو په برخلیک ټاکونکو پرېکړو کې د هغوی د ګډون لپاره مسوولیت منونکي بنسټونه او تګلارې نه دي رامنځته شوي.
نوموړي زیاته کړې چې سیاسي ګوندونه لا هم بند دي، سیاسي شخصیتونه د کورني بند په ګډون له بیلا بیلو محدودیتونو سره مخ دي او له هر ډول مانا لرونکي سیاسي خبرې ردېږي.
فایق ویلي دي: «سیاسي واک په خورا سخته کچه مرکزي پاتې شوی دی. ان د طالبانو دننه هغه څېرې چې منځلارې یا ناراضه بلل کېږي، په کابل کې نه دي توانېدلي یا یې نه دي غوښتي چې د طالبانو د مشرتابه له خوا تحمیل شوې تګلارې په مانا لرونکي ډول وننګوي.»
په ملګرو ملتونو کې د افغانستان د دایمي استازولۍ سرپرست همداراز ویلي چې د حکومتولۍ د ښهوالي ادعاوې باید د خپلواکې څارنې په نشتوالي کې د بډو اخیستو، باج اخیستنې، له واکه د ناوړه ګټې اخیستنې او په بشري مرستو کې د لاسوهنو راپورونه پټ نه کړي.
