۸صبح، کابل: په ملګرو ملتونو کې د افغانستان د دایمي استازولۍ سرپرست، نصیر احمد فایق وايي، په افغانستان کې د بشري حقونو دفاع د انسان د ازادۍ، امنیت او ژوند په بیه تمامېدای شي.
فایق چهارشنبه د تلې پر ۲۹مه، په یوه اعلامیه کې ویلي چې دا موضوع یې د ملګرو ملتونو د عمومي اسمبلۍ د ۸۱مې ناستې په درېیمه کمېټه کې مطرح کړې ده.
هغه ویلي چې طالبان د بشري حقونو مدافعان، په ځانګړې توګه ښځې په خپلسرو نیونو، شکنجې، جبري لادرکه کولو او د هغوی د کورنیو په ګواښلو سره په نښه کوي.
فایق زیاته کړې چې اعتراض کوونکې ښځې او د بشري حقونو مدافعان د طالبانو په بند کې له جنسي ځورونې، د جنسي تاوتریخوالي له ګواښونو او جنسي تېري سره مخ کېږي.
د افغانستان د دایمي استازولۍ سرپرست ویلي چې له غچ اخیستنې وېره او ټولنیزه بدنامي د بشري حقونو د سرغړونو د پېښو د راپور ورکولو او په دې اړه د حساب ورکونې مخه نیسي.
هغه ټینګار کړی چې هغه کسان چې د نجونو د زدهکړو لپاره غږ پورته کوي، د تاوتریخوالي له قربانیانو ملاتړ کوي یا د بشري حقونو د سرغړونو پېښې مستندوي، د خپل امنیت او ژوند له جدي ګواښونو سره مخ دي.
د فایق په وینا، د بشري حقونو د مدافعانو د کورنیو ګواښل د هغوی زیانمنتيا زیاتوي او نور کسان هم د خپل غږ له پورته کولو راګرځوي.
