۸صبح، کابل: په ملګرو ملتونو کې د افغانستان دایمي استازي نصیر احمد فایق په افغانستان کې د بشري حقونو د وضعیت د ښه کېدو لپاره د نړیوالې ټولنې پر بېړني او اغېزناک اقدام ټینګار کړی او د ښځو او نجونو د اساسي حقونو د بېرته خونديتوب غوښتنه یې کړې ده.
فایق پنجشنبه د لړم پر ۷مه، پر خپله اېکس پاڼه لیکلي چې د ملګرو ملتونو د عمومي اسامبلې د ۸۱مې غونډې د درېیمې کمېټې په ناسته کې یې د افغانستان لپاره د ملګرو ملتونو د بشري حقونو له ځانګړي راپور ورکوونکي ریچارد بېنېټ سره د خبرو پر مهال په هېواد کې د بشري حقونو د وضعیت د خرابېدو په اړه بحث کړی دی.
هغه ویلي، د ښځو او نجونو اساسي حقونه، چې د زده کړې، کار او ټولنیز ژوند په چارو کې د ګډون حق هم پکې شامل دی، باید بېرته خوندي شي. نوموړي همداراز ټینګار کړی چې ماشومان، ځوانان، خبریالان، د بشري حقونو مدافعان او د پخوانیو امنیتي ځواکونو غړي باید له تاوتریخوالي او د بشري حقونو له سرغړونو خوندي وساتل شي.
فایق د اړمنو کسانو لپاره د بشري مرستو پر دوام او د افغان کډوالو، پناه غوښتونکو او راستنېدونکو پر ملاتړ هم ټینګار کړی او د پناه غوښتونکو د جبري ستنولو د منع اصل د رعایت غوښتنه یې کړې ده.
په ملګرو ملتونو کې د افغانستان دایمي استازي ویلي، د بشري حقونو د جدي سرغړونو عاملان باید ځواب ویلو ته اړ کړل شي او د نړیوالې عدالت غوښتنې او حسابورکونې له میکانېزمونو ملاتړ وشي.
د فایق په وینا، افغانان په ځانګړې توګه ښځې او ځوانان، باید د هېواد د برخلیک او راتلونکي په اړه په پرېکړو کې د پام وړ ونډه ولري.
هغه یو ځل بیا د ملګرو ملتونو د اسانتياوو په مټ د افغانانو په مشرۍ او مالکیت سره د یوه سیاسي بهیر د پیل غوښتنه کړې ده؛ داسې بهیر چې د یوه ټولګډوني، استازیتوب کوونکي او ځوابویونکي حکومتي نظام د رامنځته کېدو لامل شي.
