۸صبح، کابل: طالبانو اعلان کړی چې پرون ۱۲۰ کورنۍ چې ټولټال ۵۸۸ کسان کېږي، به بېلابېلو لارو افغانستان ته راستنې شوې دي.
د طالبانو د ویاند مرستیال حمدالله فطرت پنجشنبه د لړم پر ۷مه، په یوه خبرپاڼه کې ویلي چې ۴۵ کورنۍ چې ۲۳۴ کسان کېږي، د تورخم له لارې افغانستان ته راغلې دي.
د خبرپاڼې له مخې، ۱۹ کورنۍ د سپینبولدک، ۳۷ کورنۍ د نیمروز او ۱۹ نورې کورنۍ د اسلامر کلا له لارې هېواد ته راستنې شوې دي.
له ګاونډیو هېوادونو د افغان کډوالو د راستنېدو او جبري ایستلو لړۍ په داسې حال کې روانه ده چې د ژمي موسم په رانږدې کېدو سره د راستنو شویو کورنیو د ژوند او سرپناه په اړه اندېښنې زیاتې شوې دي.
ډېرې دغه کورنۍ د لومړنیو اړتیاوو د پوره کولو، د مناسبې سرپناه موندلو او د ژمي له سړې هوا د ځان ساتلو په برخه کې له ستونزو سره مخ دي.
د هوا په سړېدو سره، په ځانګړې توګه د بېسرپناه او زیان ګالونکو کورنیو لپاره د بشري مرستو اړتیا لا زیاتېږي.
