۸صبح، کابل: په ملګرو ملتونو کې د افغانستان دایمي استازولۍ سرپرست نصیر احمد فایق ویلي چې په افغانستان کې د تلپاتې سولې ټینګښت د خلکو له رښتیني ګډون، د یوه ټولګډوني نظام له جوړولو او د هېوادوالو د حقونو له درناوي پرته ناشونی دی.
هغه چهارشنبه د لړم پر ۲۶مه، په دغه سازمان کې د افغانستان د غړیتوب د ۸۰مې کلیزې په مناسبت، سولې، برابرۍ او د خپل برخلیک د ازادانه ټاکلو لپاره د خلکو حق ته پر ژمنتیا ټینګار کړی دی.
فایق ویلي چې په دغه سازمان کې د افغانستان غړیتوب د نړیوالو همکاریو، سولې او بشري حقونو ته د درناوي په برخه کې د دغه هېواد د ژمنتیا ښودنه کوي.
هغه د افغانانو په مشرۍ او مالکیت د داسې سیاسي خبرو اترو غوښتنه کړې چې ښځې، ځوانان او د ټولنې بېلابېلې ډلې پکې رښتینی ګډون ولري.
فایق همداراز ویلي چې افغانستان په ملګرو ملتونو کې یوازې د مرستو ترلاسه کوونکی هېواد نه و، بلکې د دغه هېواد ډیپلوماټانو په مهمو نړیوالو مسوولیتونو کې هم دندې ترسره کړې دي.
هغه د ملګرو ملتونو د عمومي اسامبلې د ۱۲مې غونډې د مشر په توګه د عبدالرحمن پژواک ټاکل کېدل، په دغه سازمان کې د افغانستان د حضور او فعال رول یوه بېلګه بللې ده.
فایق زیاته کړې چې ملګرو ملتونه په خورا سختو شرایطو کې د افغانستان د خلکو ترڅنګ پاتې شوی او د زدهکړې، روغتیا، ماشومانو د ملاتړ او د بېځایه شویو په برخو کې یې مرستې کړې دي.






