۸صبح، کابل: د بشري حقونو په څار بنسټ کې د افغانستان څېړونکې فرشته عباسي وايي چې پاکستاني چارواکي دې د افغان محصلانو د ایستلو او ستنولو پرېکړه بېرته واخلي او هغوی ته په قانوني توګه د زدهکړو د دوام زمینه برابره کړي.
عباسي پنجشنبه د وږي پر ۱۹مه په خپله اېکس پاڼه کې لیکلي چې پاکستان دې د افغان محصلانو د بیا نوملیکنې له لارې د زدهکړو توپیریز بندیز لرې کړي.
نوموړې زیاته کړې چې افغان محصلان دې وکولای شي په قانوني توګه په پاکستان کې پاتې شي او خپلې لوړې زدهکړې بشپړې کړي.
دغې څېړونکې له پاکستاني چارواکو غوښتي چې د اړینو ګامونو په ترسره کولو سره د افغان محصلانو د ایستلو او د هغوی د زدهکړو د نیمګړې پاتې کېدو مخه ونیسي.
پاکستان پرېکړه کړې چې افغان محصلان دې د اداري پړاوونو له بشپړولو وروسته له دغه هېواده ووځي.
د بشري حقونو د څار سازمان هم له پاکستاني چارواکو غوښتي چې د روغتیا برخې افغان محصلانو د ایستلو پرېکړه بېرته واخلي او نویو محصلانو ته د نوملیکنې اجازه ورکړي.
