کندهار کې د افغان سرحدي ځواکونو او پاکستاني نظاميانو ترمنځ جګړه شوې

د کندهار امنيتي چارواکو په وينا، د کندهار سپين بولدک ولسوالۍ کې پر ډیورنډ فرضي کرښه د افغان سرحدي ځواکونو او پاکستاني نظاميانو ترمنځ جګړه شوې ده.
دغه جګړه د دواړه هېوادونو د ځواکونو ترمنځ نن سهار شاوخوا نهه بجې په سپين بولدک ولسوالۍ کي رامنځته شوې ده.
د سیمي څخه امنیتي سرچینو ۸صبح ته ویلي چي نښته د بولدک ولسوالۍ اړوند په لقمان کلي کې د افغان سرحدي ځواکونو او پاکستاني نظاميانو ترمنځ شوې ده چي له دواړو لوريو سپکې او درنې وسلې هم کارول شوي.
په کندهار کي د ۲۰۵ اتل قول اردو ویاند ډګرمن غلام يحيی علوي وايي چې په سیمه کې جګړه پايته رسېدلي ده او پاکستاني نظاميان پر شا تمبول شوي دي.
د نوموړي په وینا، د افغان سرحدي ځواکونو یو سرتېری په دغه جګړه کې ټپي شوی او یو موټر هم ويجاړ شوی دی، خو د نوموړي په خبره پاکستاني نظاميانو ته د اوښتي زیان په اړه لا تر اوسه معلومات نشته.
د روژې مياشتې په ترڅ کې دا دويم ځل دی چې پاکستاني نظاميان هڅه کوي د کندهار ولايت سپين بولدک ولسوالۍ اړوند لقمان کلي کې د ډيورنډ کرښې څخه راواوړي او اغزن سيم وغځوي خو د افغان سرحدي ځواکونو له لوري يې مخه نيول کېږي.