۸صبح، کابل: د ملګرو ملتونو د خوړو او کرنې سازمان (فایو) وايي چې په بادغیس، بامیان، غزني، کونړ او پکتیا ولایتونو کې ۴۶۸ کورنیو لمریز نغري ترلاسه کړي دي؛ هغه اقدام چې د دغه سازمان په وینا، د سونتوکو مصرف او د هغه له امله رامنځته کېدونکې ککړتیا کموي.
فایو شنبه د تلې پر ۵مه، ویلي چې د لمریزو نغریو کارول د لرګیو، بوټو،وچو خوشایو او ګازو په برخه کې د کورنیو اړتیاوې کموي او په پایله کې د سونتوکو د چمتو کولو لپاره لګښت او اړین وخت هم کمېږي.
د دغه سازمان په وینا، له څړځایونو د لرګیو د راټولولو کموالی کولای شي د نباتي پوښښ له خوندیتوب او پر طبیعي سرچینو د فشار له کمولو سره مرسته وکړي
فایو ویلي چې څړځایونه په بامیان کې د مالدارو او کروندګرو-مالدارو ټولنو لپاره د وښو، خوړو او عاید مهمه سرچینه ده؛ خو خورا زیات څرول او د بوټو وهل د دغو څړځایونو د تخریبېدو لامل شوي دي.
د فایو د معلوماتو له مخې، له ۲۰۱۸ کال راهیسې په بامیان کې د دغې پروژې له لارې تر ۷۷ زره او ۱۹۰ هکټاره ډېر څړځایونه احیا شوي دي.
فایو ویلي چې د څړځایونو قرنطینول، د نوبت په ډول څرول او د باجرو (یونجې) او ځايي وښو د تخونو مستقیمه توخم شنیدنه د څړځایونو د احیا لپاره له کارول کېدونکو لارو دي.
فایو زیاته کړې چې دا طرحه د اقلیمي بدلونونو پر وړاندې د ټولنو د مقاومت زیاتولو، د کلیوالو ښځو د ملاتړ او د مالدارو ټولنو د معیشت پیاوړي کولو په موخه پلي کېږي..
