۸صبح، کابل: د ملګرو ملتونو د خوړو او کرنې سازمان (فایو) وايي، سره له دې چې کرنه د میلیونونو افغانانو د ژوند اصلي ستن ده، خو افغان کروندګر لا هم د وچکالۍ، د اوبو کمښت، اپتونو، ناروغیو او اقتصادي فشارونو سره مخ دي.
نوموړي سازمان سهشنبه د چنګاښ پر ۳۰مه په خپاره کړي راپور کې لیکلي چې په داسې شرایطو کې د کرنې اړوند د بېړنیو مرستو کیفیت، د کلیوالو کورنیو د معیشت د خوندیتوب او له بحرانونو وروسته د هغوی د بېرته رغېدو د ملاتړ لپاره ځانګړی ارزښت لري.
فایو زیاته کړې چې د دغو مرستو د کیفیت د پیاوړتیا لپاره یې په افغانستان کې په لومړي وار خپل ۱۹ تخنیکي کارکوونکي د «بیړنیو حالاتو او طبیعي اپتونو پر مهال د کرنیز معیشت د ملاتړو ستنډردونو (SEADS)» په برخه کې روزلي دي.
د راپور له مخې، دا نړیوال ستنډرډونه له کارپوهانو سره مرسته کوي چې د کرنیزو مرستو د وړاندې کولو مناسب وخت، د غبرګون غوره لارې چارې او د اغېزمنتیا کچه، د شواهدو او د زیانمنو شویو سیمو د اړتیاوو پر بنسټ وټاکي.
فایو ټینګار کړی چې په افغانستان کې د بشري اړتیاوو د دوام او د کرنې پر چارو د میلیونونو کسانو د تکیې له امله، د دغه ګډ چوکاټ کارول کولی شي د کرنې په برخه کې د بېړنیو مداخلو کیفیت، همغږي او ځوابوینه لا ښه کړي.
