۸صبح، کابل: د ملګرو ملتونو د خوړو او کرنې نړیوال سازمان (فایو) وايي، په افغانستان کې د کرنې په برخه کې د نوې ټکنالوژۍ کارولو د خوړو د ضایعاتو په کمولو او د کروندګرو کورنیو د عوایدو په زیاتولو کې مرسته کړې ده.
دغه سازمان سه شنبه د تلې پر ۲۱مه، د ۲۰۲۶ کال د خوړو نړیوالې ورځې په درشل کې د دغو نوښتونو شپږ بېلګې معرفي کړې دي.
فایو زیاته کړې چې دغه نوې لارې د افغانستان له کروندګرو سره د اوبو له کمښت او اقلیمي بدلونونو سره په مبارزه، د کرنیزو محصولاتو د ضایعاتو په کمولو او د طبیعي سرچینو په ساتنه کې مرسته کوي.
په دغو لارو چارو کې د لېزر په وسیله د ځمکو هوارول، د ښځو له خوا د مرخیړیو پالنه، د مېوهلرونکو بڼونو جوړول، د سبزیجاتو لمریز وچول، د لمریز نغري کارول او د ممیزو د تولید لپاره د ځانګړو خونو جوړول شامل دي.
د فایو په وینا، په هغو کروندګرو کورنیو کې چې لمریزې وچوونکې دستګاوې يې ترلاسه کړي، د کرنیزو محصولاتو د ضایعاتو منځنۍ کچه له ۲۶ سلنې اووه سلنې ته راټیټه شوې ده.
دغه راز، په هرات کې د ممیزو د تولید په ځانګړو خونو کې د انګورو د وچولو موده له ۳۰ ورځو ۱۵ ورځو ته کمه شوې او د ضایعاتو کچه له ۴۰ تر ۵۰ سلنې ۱۰ تر ۱۵ سلنې ته راټیټه شوې ده.
فایو ویلي چې دغه لارې چارې د اوبو او طبیعي سرچینو په ښه مدیریت، د کروندګرو د عوایدو په زیاتولو او د کورنیو د خوړو خوندیتوب په ښه کولو کې مرسته کوي.
