د ملګرو ملتونو د ښځو څانګې (UN Women) خبرداری ورکړی چې له نویو ټيکنالوژیو په ځانګړې توګه له مصنوعي ځیرکتیا، په انلاین چاپېریال کې د ښځو او نجونو د ځورولو او زیانمنولو لپاره ناوړه ګټه اخیستل کېږي.
دغه بنسټ پنجشنبه د نومبر پر ۵مه په اېکس پاڼه کې لیکلي چې د ښځو او نجونو د ځورولو لپاره د ټیکنالوژۍ کارول په نویو او اندېښمنوونکو بڼو مخ پر پراخېدو دي.
د ملګرو ملتونو د ښځو څانګې دا پیغام د ښوونځیو په چاپېریال کې د سایبري ځورونې په ګډون د تاوتریخوالي او ځورونې پر ضد د مبارزې نړیوالې ورځې په مناسبت خپور کړی دی.
دغه سازمان ټینګار کړی چې په انلاین فضا کې د ځورونې لپاره هېڅ پلمه د منلو نه ده او د دا ډول چلند مخنیوی دې وشي.
د ملګرو ملتونو د ښځو څانګې «سایبري ځورونه ختمه کړئ» هشتګ په کارولو دغې ستونزې ته د ډېرې پاملرنې او په انلاین چاپېریال کې د ښځو او نجونو د ملاتړ غوښتنه کړې ده.
