جبري واده؛ ننګرهار کې یوې نجلۍ ځانوژنه وکړه
۸صبح، ننګرهار: ننګرهار کې سرچینې وایي، چې په دغه ولایت کې یوې نجلۍ خپل ژوند پایته رسولی دی.
دغې نجلۍ دوشنبه شپه د لړم پر دېرشمه نېټه د ننګرهار ولایت د مرکز جلالاباد ښار په شپږمه ناحیه کې ځانوژنه کړې ده.
دغې نجلۍ وروسته له هغې ځانوژنه کړې، چې تېره ورځ یې کورنۍ د هغې له خوښې پرته د تره له زوی سره کوژدنه کړې ده.
دغه نجلۍ چې د ننګرهار ولایت د خوګیاڼي ولسوالۍ اصلي اوسېدونکې وه، ځان یې په یوه کلشینکوف ټوپک وژلی دی.
د دې نجلۍ کورنۍ ویلي، چې هغه د زړه د ناروغۍ له امله مړه شوې ده، خو د سیمې اوسېدونکي دا موضوع ردوي.
ننګرهار کې طالبانو تر اوسه په دې اړه څه نه دي ویلي.
په دې وروستیو کې افغانستان کې ځانوژنې زیاتې شوې، چې یو لامل یې جبري ودونه دي.
