جبري واده؛ په کندز کې یوې پېغلې نجلۍ ځان په دار وځړاوه

۸صبح، کندز: په کندز کې ځايي سرچینې وایي چې د دغه ولایت په مرکز کې یوې اتلس کلنې نجلۍ ځان زندۍ کړی دی.
دا پېښه د دوشنبې په ورځ د کب په ۸مه د کندز ښار د درېیمې ناحیې اړوند د زاخېل قدیم په سیمه کې رامنځته شوې ده.
په کندز کې سیمه يیزو سرچینو د دغې پېغلې نجلۍ د ځان وژنې علت جبري واده بللی. هغه په دې وروستیو کې د خپلې خوښې پرته د کورنۍ په خوښه له یوه هلک سره کوژده شوی وه.
څه موده وړاندې هم د کندز په مرکز کې یوې نجلۍ او هلک چې له يو بل سره یې مینه درلوده، له اجباري واده وروسته ځان وژنه وکړه.
د راپورونو له مخې، وروسته له هغه چې طالبان پر افغانستان واکمن شول، کورني تاوتریخوالي او جبري ودونه زیات شوي دي.