۸صبح، کابل: طالبانو ویلي چې تېره پنجشنبه ۲۶۷ کډوالې کورنۍ چې ۱۲۸۹ تنه افغان کډوال پکې شامل دي، افغانستان ته راستانه کړل شوي دي.
د طالبانو د ویاند مرستیال حمدالله فطرت د جمعې پر شپه د وږي پر شپږمه، په یوه خبرپاڼه کې ویلي چې د تورخم له لارې ۱۶۸ کورنۍ چې ۸۷۹ تنه کېږي، افغانستان ته راستنې شوي دي.
د خبرپاڼې له مخې، نهه کورنۍ د سپینبولدک له لارې، ۶۹ کورنۍ د نیمروز له لارې او ۲۱ کورنۍ هم د اسلام کلا له لارې افغانستان ته راغلې دي.
دا کډوال په داسې حال کې راستنېږي چې له پاکستان او ایرانه د افغان کډوالو د ایستلو او جبري ستنولو بهیر لا هم دوام لري.
خو د ملګرو ملتونو د بشري استوګنې پروګرام (هبیټاټ) تازه راپور ورکړی چې په تېرو درېیو کلونو کې څه باندې شپږ میلیونه افغان کډوال هېواد ته راستانه کړل شوي چې مناسبو سرپناهوو ته اړتیا لري.
