۸صبح، کابل: په افغانستان کې د ملګرو ملتونو د مرستندویه دفتر (یوناما) سرپرستې جورجت ګانیون اسلامکلا ته د خپل سفر په ترڅ کې له هغو افغانانو چې له ایران او پاکستانه راستنېږي، د دوامداره ملاتړ پر اړتیا ټینګار کړی دی.
ګانیون پنجشنبه د تلې پر ۹مه ویلي چې راستنېدونکي یوازې د راستنېدو په ځایونو کې مرستو ته اړتیا نه لري، بلکې د بیا مېشتېدو لپاره هم بشردوستانه ملاتړ او اړینو خدماتو ته اړتیا لري.
د یوناما سرپرستې له طالب چارواکو او نړیوالو شریکانو غوښتي چې له راستنېدونکو او کوربه ټولنو خپل ملاتړ ته دوام ورکړي.
ملګرو ملتونو د روان میلادي کال په لومړیو کې له راستنېدونکو د ملاتړ لپاره د ۵۲۹ میلیونو ډالرو په ارزښت پروګرام پیل کړی.
د دغه پروګرام موخه له شاوخوا ۲.۷ میلیونو افغانانو سره مرسته ده چې د اټکل له مخې به د ۲۰۲۶ کال د اپریل او ډسمبر میاشتو ترمنځ له ایران او پاکستانه راستانه شي.
