۸صبح، کابل: د ملګروم ملتونو د کډوالو عالي کمېشنرۍ (UNHCR) ویلي، هغو افغانانو ته چې په پاکستان کې له کلونو ژوند وروسته افغانستان ته راستنېږي، نغدي مرستې برابروي.
دغه سازمان پنجشنبه د تلې پر ۹مه په اېکس پاڼه کې لیکلي چې د اروپايي ټولنې د بشردوستانه برخې په ملاتړ، له راستنېدونکو افغانانو سره نغدي مرستې کوي.
ملګرو ملتونو ویلي چې دا مرستې له هغو راستنېدونکو چې د راستنېدو په لومړي پړاو او په افغانستان کې د ژوند په بیاپیلولو کې له ستونزو سره مخ دي، ملاتړې سرچینه ده.
دا مرستې داسې مهال وړاندې کېږي چې په وروستیو میاشتو کې ګڼ افغانان له ګاونډیو هېوادونو راستانه شوي دي.
