۸صبح، کابل: طالبانو ویلي چې له ګاونډیو هېوادونو ۴۱۴ کورنۍ چې ټولټال دوه زره او ۱۷۱ افغان کډوال کېږي، افغانستان ته راستنې شوې دي.
د طالبانو د ویاند مرستیال حمدالله فطرت يکشنبه د چنګاښ پر ۱۴مه، د خبرپاڼې په خپرولو سره ويلي چې یوازې د تورخم له لارې ۳۶۷ کورنۍ چې یو زر ۱۹۴۹ کسان پکې شامل دي، هېواد ته راغلې دي.
د خبرپاڼې له مخې، ۳۰ کورنۍ د کندهار د سپینبولدک، ۱۵ کورنۍ د هرات د اسلامکلا او دوه کورنۍ د هلمند د بهرامچې له لارې افغانستان ته راستنې شوې دي.
دا په داسې حال کې ده چې له ګاونډیو هېوادونو په زور را ایستل شوي افغان کډوال په افغانستان کې د کار، سرپناه او روغتیايي خدمتونو له نشتوالي، د ماشومانو لپاره د ښوونیزو بنسټونو له کمښت او د ښځو پر وړاندې د طالبانو له سختو محدودیتونو سره مخ دي.
