۸صبح، کابل: طالبانو ویلي چې پرون ۴۴۲ کورنۍ چې ۲ زره او ۲۲۱ کسان پکې شامل دي، له بېلابېلو لارو افغانستان ته راستنې کړل شوي دي.
د طالبانو د ویاند مرستیال حمدالله فطرت شنبه د زمري پر ۱۷مه، په یوه خبرپاڼه کې ویلي چې یوازې د تورخم له لارې ۳۵۹ کورنۍ چې ۱۸۸۶ کسان پکې شامل دي، افغانستان ته راستنې شوې دي.
د دې خبرپاڼې له مخې، ۳۱ کورنۍ د سپین بولدک له لارې، ۳۹ کورنۍ د نیمروز له لارې او ۱۳ کورنۍ هم د اسلام کلا له لارې افغانستان ته راغلي دي.
دا په داسې حال کې ده چې په وروستیو میاشتو کې له ایران او پاکستانه د افغان کډوالو د پراخې جبري اېستنې څپې د افغانستان پر کوربه ټولنو او محدودو سرچینو د پام وړ فشار راوستی دی.
نړیوالو سازمانونو تر دې وړاندې د ګڼو راستنېدونکو د منلو لپاره د افغانستان د محدود ظرفیت په تړاو خبرداری ورکړی او د هغوی د اړتیاوو د پوره کولو لپاره یې د بشري مرستو د زیاتولو پر اړتیا ټینګار کړی دی.
