۸صبح، کابل: طالبانو ویلي چې پرون ۱۸۲ کورنۍ چې شمېر یې ۹۳۷ کسانو ته رسېږي، له بېلابېلو لارو په جبري توګه افغانستان ته راستنې کړل شوې.
د طالبانو د ویاند مرستیال حمدالله فطرت پنجشنبه د وږي پر ۱۹مه، په یوه خبرپاڼه کې ویلي چې یوازې د تورخم له لارې ۸۶ کورنۍ چې ۴۷۶ کسان پکې شامل دي، هېواد ته راستنې شوې دي.
د خبرپاڼې له مخې، ۲۶ کورنۍ د سپینبولدک له لارې، ۵۶ کورنۍ د نیمروز له لارې او ۱۴ کورنۍ د اسلام کلا له لارې افغانستان ته راستنې شوې دي.
دا په داسې حال کې ده چې افغانستان ته راستنې شوې کورنۍ د خپل ژوند د بیا پیل لپاره له بېلابېلو ستونزو سره مخ دي.
د یادونې وړ ده چې د نړیوالو بنسټونو د راپورونو له مخې، هېواد ته د کډوالو پراخې راستنېدنې په افغانستان کې د استوګنې، کارموندنې او اقتصادي ستونزو د لا زیاتېدو لامل شوې دي.
