۸صبح، کابل: طالبانو اعلان کړی دی چې پرون ۲۲۳ کورنۍ چې ۹۹۹ کسان کېږي، له بېلابېلو لارو افغانستان ته را ستنې شوې دي.
د طالبانو د ویاند مرستیال حمدالله فطرت پنجشنبه د وږي پر ۲۶مه، په یوه خبرپاڼه کې ویلي دي چې د تورخم له لارې ۹۱ کورنۍ چې ۴۵۴ کسان کېږي، هېواد ته راستنې شوې دي.
د دې خبرپاڼې له مخې، ۲۳ کورنۍ د سپینبولدک له لارې، ۳۹ کورنۍ د نیمروز له لارې او ۱۶ نورې کورنۍ د هرات د اسلام کلا له لارې افغانستان ته راغلې دي.
دا په داسې حال کې ده چې له ایران او پاکستانه د افغان کډوالو د اېستلو او جبري راستنېدو بهیر لا هم دوام لري.
رویټرز خبري اژانس په خپل تازه راپور کې ویلي وو چې په ایران کې سخت اقتصادي ناورین د دې لامل شوی چې د طالبانو له سختو محدودیتونو، په تېره بیا د ښځو او نجونو پر وړاندې له شته ستونزو سره سره، ډېری افغان کډوال بېرته هېواد ته ستنېدو ته غاړه کېږدي.
