د عمان، ایران او ازبکستان د بهرنیو چارو وزیرانو په مسقط کې پر سیمهییزو بدلونونو او د کړکېچ د کمولو په اړه خبرې کړې دي.
د عمان د بهرنیو چارو وزارت سهشنبه د نومبر پر ۱۷مه خبر ورکړی چې په دې ناسته کې د سیمهییزو ستونزو د حل لپاره پر مذاکراتو ټینګار شوی دی.
دغه وزارت زیاته کړې چې درې واړو نړیوالو قوانینو ته په پام او له پېچلو ستونزو او مسایلو سره د یو شان چلند پر اړتیا سلا کړې ده.
هغوی د سمندري تګ راتګ د ازادۍ پر بېرته ټینګښت او د نړیوالې سوداګرۍ د خونديتابه پر اړتیا ټینګار کړی دی.
د عمان د بهرنیو چارو وزارت د بازارونو د ثبات او سوداګرۍ د پیاوړتیا لپاره د وارداتو او صادراتو بېرته پیل هم مهم بللی دی.






