د اردن او عراق چارواکو اعلان کړی چې د ملي امنیتي لاملونو له مخې به د ټیلیګرام پیغام رسوونکي اپلېکېشن کارول منع کړي.
د اردن د عامه امنیت ادارې دوشنبه د نومبر پر ۱۶مه ویلي چې د دغه اقدام موخه د ناقانونه او افراطي محتوا د خپرېدو مخنیوی دی.
د دغه بنسټ د خبرپاڼې له مخې، دا پرېکړه په اردن کې د امنیتي تدابیرو د زیاتوالي په لړ کې شوې ده.
اردني چارواکو تېره میاشت پر یوې یوناني ارتودوکس کلیسا له برید وروسته چې نهه کسان پکې ووژل شول، امنیتي تدابیر سخت کړي دي.
ورته مهال د عراق د رسنیزو اړیکو بنسټ ویلي چې د دې پرېکړې موخه د عراق اړوند محتوا ارزولو ته د ټیلیګرام اړ ایستل دي.
دغه بنسټ زیاته کړې چې ټیلیګرام د هغې محتوا د خپرېدو د مخنیوي لپاره هم بند شوی چې له قوانینو سرغړونه کوي.






