۸صبح، کابل: د ملګرو ملتونو د بشردوستانه مرستو د همغږۍ دفتر (اوچا) وايي چې د افغانستان لپاره ۱۸ میلیونه ډالره بېړنۍ مرسته تصویب شوې ده.
اوچا سهشنبه د لړم پر ۲۶مه ویلي چې دا بودیجه به له څه باندې ۸۲۴ زرو زیانمنونکو سره مرسته وکړي.
دغه بنسټ زیاته کړې چې دا مرسته د ملګرو ملتونو د بېړنیو حالاتو د غبرګون له مرکزي صندوق (CERF) څخه تمویلېږي.
دا بودیجه به د خوړو خوندیتوب، کرنې، روغتیا، تغذیې، خوندیتوب، سرپناه، څښاک اوبو او حفظالصحې په برخو کې پر اوو پروژو ولګول شي.
د دغه پروګرام موخه د کورنیو د بېړنیو اړتیاوو په پوره کولو او د بنسټيزو خدماتو په دوام د مړینې، ناروغیو او د خوندیتوب اړوند ګواښونو مخنیوی دی.
ملګرو ملتونو زیاته کړې چې بېرته راستانه شوي کډوال، کورني بېځایه شوي، ښځې، ماشومان او نور زیانمنونکي ټولي د دغو مرستو په لومړیتوب کې دي.






