۸صبح، کابل: سیمهییزې سرچینې وايي چې په مخکېني حکومت کې د غزني د ګیلان ولسوالۍ د محلي پولیسو قوماندان شریفالله د پاکستان په بلوچستان ایالت کې ناڅرګندو وسلهوالو ویشتلی دی.
سرچینو دوشنبه د لړم پر ۲۵مه ۸صبح ورځپاڼې ته وویل چې دا پخوانی نظامي د بلوچستان په «سروانان» بازار کې د وسلهوالو په مخامخ ډزو کې وژل شوی دی.
د سرچینو په خبره، شریفالله په مخکېني حکومت کې د غزني د ګیلان ولسوالۍ د محلي پولیسو قوماندان و.
سرچینو زیاته کړې چې نوموړی د پخواني حکومت له پرځېدو وروسته ایران ته تللی و او موده مخکې په دغه هېواد کې په یوه وسلهوال برید کې له ټپي کېدو وروسته پاکستان ته تللی و.
تر اوسه د نوموړي د وژلو مسوولیت چا یا کومې ډلې نه دی منلی.
سرچینو له ۸صبح ورځپاڼې سره په خبرو کې ویلي چې طالبانو خپل ځینې کسان د پاکستاني طالبانو تحریک (ټيټيپي) لیکو ته استولي څو په دغه هېواد کې مېشت پخواني افغان نظامیان په نښه کړي.






