د کرنې، اوبو لګولو او مالدارۍ وزارت د بڼوالۍ ځنځیري ارزښت د پراختیا پروژه «HVCDSP» په پام کې لري، چې د ۱۴۰۰ام مالي کال په ترڅ کې د ننګرهار، لغمان او خوست په ولایتونو کې د خرماوو ۱۵۰ جریبه بڼونه جوړ کړي.
د کرنې، اوبو لګولو او مالدارۍ وزارت لخوا په خپرې شوې خبرپاڼه کې راغلي دي چې، د دغو جوړېدونکو بڼونو له ډلې ۷۵ جریبه یې په ننګرهار، ۵۰ جریبه یې په خوست او ۲۵ جریبه يې په لغمان ولایت کې جوړیږي. یاد ولایتونه د خرماوو ونو د ودې په پار مناسبه اوبه-هوا او چاپېریال لري. د دغو بڼونو په جوړېدو سره په یادو ولایتونو کې د خرماوو بڼونو د پراختیا او دودولو په برخه کې اغېزناک ګامونه اخیستل کیږي.
د کرنې وزارت مسوولينو په وينا خرما تر ډېره په ګرمو سیمو کې وده کوي. هلمند، فراه، کندهار، لغمان، خوست او ننګرهار د خرماوو پالنې لپاره مناسب اقلیم لري.
د بڼوالۍ ځنځیري ارزښت د پراختیا پروژه د کرنې، اوبولګولو او مالدارۍ وزارت له مهمو پروژو څخه ده، چې د آسیا پراختیایي بانک «ADB» لخوا تمویلېږي او د هېواد په ۱۱ ولایتونو کې، چې د مېوو او سبو ستر تولیدوونکي دي د بڼوالۍ ځنځیري ارزښت د پیاوړتیا، د بڼوالۍ محصولاتو د وارداتو د بېلانس بدلون او صادراتو د زیاتوالي په موخه فعالیت کوي.
