په زابل کې د اوبو څلور لوي بندونه جوړېږي

زابل له هغو ولایتونو څخه دی چې ډېرې کرنیزې زمکې لري او اوسېدونکي یې تر ډېره په کرنیزو چارو بوخت دي. دا ولایت چي په وچه کې راګیر دی اوس د اوبو د مدیریت لپاره نوې هڅې پکې پیل شوې چې له مخي يې په دې ولایت کي د څلورو نویو بندونو د جوړولو چاري پیلېږي. ددې ولایت چارواکي وايي، چې ددغو بندونو د جوړولو لومړني کارونه بشپړ شوي دي. ددغو بندونو په جوړېدو سره به په دې ولایت کې کرنه وده وکړي او د برېښنا ستونزه به یې هم تر یوه بریده اواره شي. د زابل د کرنې ریاست مسوولین وایي، چې د کرنې د ودې او اوبو د کابو کولو لپاره د څلورو لویو بندونو د سروې لومړني کارونه بشپړ شوي دي. ددغو بندونو په جوړېدو سره به کابو ۴۰ میلیون متر مکعبه اوبه کنټرول او ۳۶ زره جریبه زمکه خړوبه شي.
د زابل والي احمد ګل رسولي وايي چې ددغو بندونو په جوړېدو سره به ۷۷ میګاواټه برېښنا هم تولید شي، چې په زابل کې به تر ډېره د برېښنا ستونزه حل شي. نوموړی زیاتوي، دغه څلور بندونه به زابل په یوه عایداتي ولایت بدل کړي او دا ولایت به پر پښو ودروي، همداراز به په زرګونه هکتاره زمکه هم خړوبه کړي او د زابل اوسېدونکي به له برېښنا څخه برخمن شي. پر همدې مهال ددې ولایت د اوبو لګولو چارو رییس ناصر شاه وزېر وايي چې د۱۳۲ میلیونه افغانیو په ارزښت په مرکز کلات او ولسوالیو کې د شپږو لویو او وړو بندونو د جوړېدو کارونه روان دي. نوموړی وايي: دغه څلور بندونه او څو نور چک ډېمونه چي اوس یې تدارکاتي بهیر پشپړ شوی چارې یې پیلېدونکې دي. له بلې خوا، د دې ولایت یو شمېر کرونګر تمه لري، چې دولت دې د بندونو جوړولو ته ځانګړې پاملرنه وکړي.
د زابل دوه کرونګر دوست محمد او همایون وايي چې په زابل کې په تېرو شلو کلونو کې د بندونو د جوړیدو په برخه کې کار نه دی شوی او د وچکالۍ له امله یې ډېری بڼونه وچ شوي دي. دوي تمه لري چې دولت د اوبو د بندونو جوړولو ته جدي پام وکړي. دوی زیاتوي، اوس مهال یو شمېر کورنۍ د اوبو د نشتوالي له امله نورو سیمو ته کډه شوې دي. دوي وايي: ډېر خوښ دي چي دولت د اوبو د مدیریت په برخه کې هڅې پيل کړې ترڅو د کلیوالو سیمو اوسېدونکي له خپلو کروندو ښه عواید ترلاسه کړي. په زابل کې په داسې حال کې د څلورو بندونو د جوړېدو خبره کېږي، چې افغان دولت هوډ لري، د اوبو د مدیریت په موخه د هېواد په بېلابېلو سیمو کې یو شمېر بندونه جوړ کړي.