۸صبح، سمنګان: د سمنګان ولایت په خُلم ولسوالۍ کې په دوو جلا ترافیکي پېښو کې څلور کسان مړه شوي او یو بل ټپي شوی دی.
په سمنګان کې د طالبانو امنیه قوماندانۍ يکشنبه د لړم پر ۱۷مه، ویلي، چې په لومړۍ پېښه کې هینو ډوله موټر د شباغلي کوتل پر لاره له یوه کرولا موټر سره ټکر کړی دی.
د طالبانو په وینا، په دې پېښه کې درې کسان مړه شوي او یو بل ټپي شوی دی.
د طالبانو امنیه قوماندانۍ زیاته کړې، چې دویمه پېښه د خُلم ولسوالۍ د خواجه غایب په سیمه کې د یوه کرولا ټکسي موټر د چپه کېدو له امله شوې ده.
په دې پېښه کې هم یو کس مړ شوی دی.
دا په داسې حال کې ده، چې پرون هم د لغمان ولایت په قرغیو ولسوالۍ په یوه ترافیکي پېښه کې اووه کسان مړه شوي او دوه نور ټپیان شوي وو.
له ټاکلي حده ډېر سرعت، د موټرچلوونکو بېاحتیاطي، د ترافیکي قوانینو نه مراعاتول او د سړکونو خراب وضعیت د ترافیکي پېښو له مهمو لاملونو بلل شوي دي.
