۸صبح، کابل: د کډوالو په چارو کې د ملګرو ملتونو عالي کمېشنرۍ ویلي، د سپټمبر میاشتې تر پایه له ايران او پاکستانه نږدې یو میلیون او ۲۹۰ زره افغان کډوال خپل هېواد ته راستانه ستانه شوي دي.
دغه بنسټ يکشنبه د لړم پر ۱۷مه، په یوه راپور کې ویلي، چې شاوخوا ۴۳ سلنه دغه کسان په زور له دغو هېوادونو ایستل شوي دي.
د راپور له مخې، د پناهغوښتونکو او راستنو شویو کډوالو له ډلې څه باندې ۲۰۲ زره کسانو په سرحدي سیمو کې نغدي مرستې ترلاسه کړې دي.
په راپور کې راغلي، چې د راستنېدو په سیمو کې شاوخوا ۳۴۰ زیان ګالو کورنیو ته د ژوند د بیا رغونې لپاره مالي مرستې ورکړل شوې دي.
د ملګرو ملتونو دغه بنسټ زیاته کړې، چې شاوخوا دوه زره او ۳۰۰ هغو کسانو ته هم نغدي مرستې ورکړل شوې دي، چې ځانګړي ملاتړ ته یې اړتیا لرله.
د ملګرو ملتونو د کډوالو عالي کمېشنرۍ همداراز ویلي، چې نږدې دوه زره او ۶۰۰ کورنیو د کورنیو د اړینو وسایلو د برابرولو لپاره نغدي مرستې ترلاسه کړې دي.
