۸صبح، کاپیسا: په کاپیسا کې ځايي سرچینې وايي چې په دغه ولایت کې د شدیدو ورښتونو له کبله د یوه کور د چت پرېوتو په پېښه کې د ښځو او ماشومانو په ګډون څلور کسان مړه شوي دي.
سرچینو یکشنبه د غويي پر ۲۰مه ۸صبح ورځپاڼې ته ویلي چې دا پېښه د تګاب ولسوالۍ په «بدراب» کلي کې شوې او قربانیان د یوې کورنۍ غړي دي.
د سرچینو په خبره، پېښه نن له غرمې وروسته د شدیدو بارانونو او ږلۍ وروسته شوې ده.
د ورښتونو په پایله کې په سیمه کې کروندو او ونو ته هم جدي زیانونه اوښتي دي.
د ملګرو ملتونو د بشردوستانه مرستو د همغږۍ دفتر (اوچا) ویلي و چې د افغانستان په ګوټ ګوټ کې وروستیو سېلابونو څه باندې ۷۰ زره کسان اغېزمن کړي دي.
