۸صبح، کابل: فرانسې اعلان کړی چې په دغه هېواد کې د ناقانونه اوسېدونکو افغان کډوالو د ستنولو په اړه د طالبانو له چارواکو سره خبرې کوي.
د فرانسې د کورنیو چارو وزیر لوران نونز دوشنبه د لړم پر ۱۱مه، ویلي چې هڅه کوي د هغو افغانانو د ستنولو زمینه برابره کړي چې د اوسېدو قانوني اسناد نه لري.
د فرانسې د کورنیو چارو وزیر ویلي چې ښايي د دغو کسانو یوه برخه د عامه نظم لپاره ګواښ وي او د هغوی ستنول یې له لومړیتوبونو ګڼلي دي.
په همدې حال کې، د فرانسې د زرغونو ګوندونو استازې لیا بالاج المریکی د دغه هېواد حکومت تورن کړی چې په دې اقدام سره له طالبانو سره د اړیکو د عادي کولو بهیر پیلوي.
د هغې په وینا، طالبان هغه ډله ده چې د ښځو او نجونو پر حقونو د محدودیتونو په لګولو سره یې د بشریت ضد جنايتونه ترسره کړي دي.
تر دې مخکې، د ملګرو ملتونو د بشري حقونو عالي کمېشنر د سپټمبر په میاشت کې د افغانستان د بشري حقونو د ناورین پر وړاندې د نړیوالې ټولنې پر چوپتیا نيوکه کړې او د کډوالو د جبري ستنولو د درولو غوښتنه یې کړې وه.
