۸صبح، کابل: نړیوالو رسنیو راپور ورکړی چې فرانسې له طالبانو سره د هغو افغانانو د بېرته ستنولو په اړه تخنیکي خبرې پیل کړې دي چې جرمي مخينه لري.
د فرانسې خبري اژانس چهارشنبه د تلې پر ۱۵مه، راپور ورکړی چې دا خبرې د هغو کسانو په اړه دي چې په فرانسه کې په ناقانونه توګه مېشت دي او د فرانسوي چارواکو په اند، د عامه نظم لپاره «ګواښ» بلل کېږي.
په دې بهیر کې په ځانګړي ډول هغه کسان شامل دي چې د قاچاق یا له خلکو سره د تاوتریخوالي په جرمونو کې د لاس لرلو له امله محکوم شوي دي.
په همدې حال کې، د فرانسې خبري اژانس د یوې ډیپلوماتیکې سرچینې په حواله ویلي چې دا تخنیکي خبرې له طالبانو سره د فرانسې د دریځ د بدلون په مانا نه دي.
فرانسې د ۲۰۲۱ کال په اګست کې د طالبانو له بیا واکمنېدو راهیسې له دې ډلې سره خپلې ډیپلوماتیکې اړیکې نه دي ساتلي او په کابل کې یې سفارت لا هم تړلی دی.
