۸صبح، کابل: د افغانستان د مقاومت ملي جبهې په کابل کې پر یوناما دفتر د دې جبهې له لوري د برید د طرحې د ادعا په اړه د طالبانو خپره کړې ویډیو رد کړې او په دې ویډیو کې د کسانو اعترافونه یې «په زور اخیستل شوي» بللي دي.
دې جبهې پنجشنبه د تلې پر ۱۶مه، په یوه اعلامیه کې د طالبانو له خوا خپره شوې ویډیو «په زور اخیستل شوې روایت» بللې او د ناسمو اطلاعاتو د خپرولو د کمپاین یوه برخه یې ګڼلې ده.
د مقاومت ملي جبهې زیاته کړې: «هغه معلومات چې د طالبانو تر فشار لاندې ترلاسه کېږي، اساساً هېڅ اعتبار نه لري او نړیوال امنیتي بنسټونه باید له هغو سره په جدي شک او احتیاط چلند وکړي.»
د مقاومت ملي جبهې ټینګار کړی چې طالبانو درې کاله وړاندې هم ورته ادعا کړې وه چې ګواکې دې جبهې په کابل کې پر یوناما د بريد پلان درلود.
دې جبهې له یوناما او نړیوالو امنیتي بنسټونو غوښتي چې د دې ویډیو د جوړېدو څرنګوالي او د اعترافونو د اخیستو د شرایطو په اړه خپلواکې څېړنې وکړي.
د مقاومت ملي جبهې همداراز ټینګار کړی چې ملکي وګړي، ډیپلوماتیک او نړیوال بنسټونه او بې وسلې کسان نه په نښه کوي او خپل فعالیتونه یې د طالبانو پر وړاندې د مبارزې او د قانون د حاکمیت د بېرته ټینګولو لپاره بللي دي.
