د فرانسې او جرمني مشرانو ویلي چې اوکرایین باید دا اجازه ولري څو د روسیې دننه پر پوځي تاسیساتو برید وکړي، خو نور ځایونه باید په نښه نه کړي.
د رویټرز راپور پر بنسټ د فرانسې او جرمني مشرانو دا څرګندونې سېشنبه د مې پر ۲۸مه د جرمني په میسبرګ ښار کې د یوې ګډې خبري ناستې پر مهال کړې دي.
څو ساعته دمخه د روسیې ولسمشر ولادیمیر پوتین لوېدیځ ته خبرداری ورکړی و چې په اروپا کې د ناټو غړي اوکرایین ته وړاندیز کوي څو دغه هېواد اجازه ولري په روسیه کې د لوېدیځ وسلې وکاروي او دا کېدای شي د نړۍوالې جګړې لامل شي. د پوتین په خبره، لوېدیځ له اور سره لوبې کوي.
د فرانسې ولسمشر ایمانوېل مکرون ویلي: «موږ د اوکرایین ملاتړ کوو او د تاوتریخوالي د زیاتېدو غوښتونکي نه یو. دا سیاستونه نه دي بدل شوي.»
نوموړي زیاته کړې: «موږ تصور کوو چې باید هغوی [اوکرایین] ته اجازه ورکړو څو د [روسیې] پوځي اډې چې له هغه ځایه توغندي توغول کېږي او هغه پوځي کمپونه چې اوکرایین په نښه کوي، له کاره وغورځوي. خو هغوی ته اجازه نه ورکوو چې په روسیه کې نورې سیمې، ملکيان یا د روسیې نورې پوځي اډې په نښه کړي.»
د جرمني لومړي وزیر اولاف شولتس هم ویلي چې دی له مکرون سره همغږی دی او «اوکرایین تر هغو چې نړۍوال قوانین او د متحده ایالاتو په ګډون د هغو هېوادونو شرطونه چې پوځي وسلې یې په اختیار کې ورکړي، رعایت کوي، اجازه لري څو له ځانه دفاع وکړي.»
له دویمې خونړۍ نړۍوالې جګړې را وروسته او په داسې شرایطو کې چې لوېدیځ په اوکرایین کې د روسي پوځ د پرمختګ د مخنیوي پر لارو چارو غور کوي، پوتین په وار وار د یوې بلې نړۍوالې جګړې خبرداری ورکوي، خو لوېدیځ بیا دا اټکل ناڅيزه بولي.
